Ажил хэрэгч хувцаслалт

Эмэгтэйчүүд бидний хувьд ажилдаа явахдаа юбка өмсөх үү эсвэл өмд өмсөх үү? өсгийтэй гутал эсвэл намхан гутал өмсөх үү?гээд өдөр бүр иймэрхүү асуултуудыг өөртөө тавьж сонголт хийх шаардлагатай болдог. Магадгүй танай компанид дагаж мөрддөг хувцаслалтын журам байдаг, эсвэл ажлын дүрэмт хувцас заавал өмсөх ёстой ч байж магадгүй. Азтай зарим хүмүүст бүр юу ч өмссөн таны эрх гээд орхисон байгууллага ч байж л байгаа. Гэхдээ та хаана ч ажилладаг байлаа гэсэн ажил хэрэгч хувцаслалтын тухай анхан шатны мэдлэгтэй байх хэрэгтэй.

Ажил хэрэгч хувцаслалт гэж юу вэ?

Ажил хэрэгч хувцаслалт буюу оффис хувцаслалт гэдэг нь өөрийн хүрээний хүмүүсийн түвшинд тааруулан, ажил мэргэжил, нөхцөл байдал болон биеийн онцлогтоо тохируулан, илүү хээнцэрлэлгүй мөн хэтрүүлэлгүй орчиндоо зохицуулан цэвэр цэгцтэй хувцаслахыг хэлнэ.

Ажилдаа өмсөх хувцсаа сонгохдоо өөрийн эрхэлдэг ажил, мэргэжилдээ тохиромжтой мөн өөрийн хүсэл сонирхлыг шингээсэн хувцас өмсөхөөс гадна хамгийн гол нь өөрийн биеийн галбир, нурууны хэмжээ зэргийг харгалзан үзэж, өөрт таарч тохирсон, зохисон хувцсыг сонгон өмсөхийг хичээх хэрэгтэй.

Мэдээж өөрт таарч тохироогүй, зохицоогүй хувцас таныг тийм ч сайхан харагдуулахгүй шүү дээ. Тиймээс бид танд оффисын нөхцөлд албан ёсны, ажил хэрэгч хувцаслалтын баримталдаг зарчим, стандарт, хориглох зүйлсийн тухай мэдээлэл бэлтгэн хүргэж байна.

Ажил хэрэгч эмэгтэйчүүдийн хувцаслалт ямар байх талаар гадаад дотоодын ном хэвлэлд зөвлөсөн зүйл олон байдаг. Юуны өмнө ямар арга хэмжээнд ямар хувцас өмсөх вэ гэдгээ сайтар бодох нь чухал. Ямар нэгэн шинэ загвар гарч ирэнгүүт л авч өмсөх гэсний хэрэггүй.

Хамгийн энгийнээр ажил хэрэгч хувцаслалт нь:

Өнгөний зөв сонголттой,
Ил задгай биш,
Цэвэрхэн, хир толбогүй,
Индүүдсэн байх хэрэгтэй.

Эмэгтэйчүүдийн оффис хувцаслалтын стандарт:

Костюм: -Өмд пиджак, -Юбка пиджак, -Даашинз пиджак
Ажил хэрэгч даашинз /өвдөгнөөс дээш, доош 4-6 хуруу/
Цамц, сорочик /ханцуйтай, ханцуйгүй/
Юбка /өвдөгнөөс дээш, доош 4-6 хуруу/ Өмд
Тирко /хар, саарал биеийн өнгөтэй/
Өсгийтэй гутал /өсгийний хэмжээ 3-7 см байх/

Эмэгтэйчүүдийн оффис хувцаслалтад хориглох зүйлс:

Жинсэн өмд, цамц
Спорт загварын хувцас, гутал, пүүз
Хэт эрээн хувцас
Хэт богино юбка, даашинз
Энгэр задгай, хөх ил гарсан цамц, даашинз
Бусдыг өдөөсөн гэрэлтдэг торон хувцас
Өвлийн хэт арьс үстэй, бугын гутал гэх мэт.
Эдгээр хувцаслалтдаа тохируулан бугуйн цаг, ээмэг, зүүлт гээд та өөрийн хүссэн эд зүйлсээ зүүн, загвараа тодорхойлж болно.

Та эрэгтэйчүүдийн оффис хувцаслалтын стандартыг сонирхол байвал энд дарна уу.

Ажил хэрэгч хувцаслалт